Departamenti i Edukimit dhe Gjuhës Angleze në Kolegjin Universitar Bedër organizoi ceremoninë e ndarjes së çmimeve për punimet më të mira në konkursin YCEEC, organizuar me nxënësit e shkollave të mesme.
Dr. Irena Shehu, përgjegjëse e Departamentit të Edukimit dhe Gjuhës Angleze, theksoi faktin se cilësia e punimeve ka shënuar rritje çdo vit, duke përgëzuar pjesëmarrësit.
Anëtarë të stafit dhe studentët pjesëmarrës patën mundësinë të shprehin vlerësimet e tyre lidhur me organizimin e përvitshëm të këtij konkursi duke i dhënë mundësinë të rinjve të shpalosin aftësitë e tyre.
Më pas u shpërndanë çertifikatat për pjesëmarrësit dhe fituesit e çmimeve sipas kategorive.
NJSBC koordinoi takimet e Grupit të Vlerësimit të Jashtëm me stafin akademik, grupin punës dhe studentët e departamentit të Edukimit dhe Gjuhës Angleze, në kuadër të procesit të akreditimit për programin Master Profesional në Mësuesi: Gjuhë Angleze në dy profile: Arsim i Mesëm i Lartë dhe Arsim i Mesëm i Ulët.
Dekanati i Studentëve, në bashkëpunim me Zyrën e Klubeve Studentore dhe disa nga studentët e Departamentit të Edukimit dhe Gjuhës Angleze, organizoi Ditën Internacionale në ambientet e Kolegjit Universitar Bedër.
Studentët tanë internacionalë, patën mundësinë të tregonin më shumë rreth kulturave dhe traditave të larmishme të shteteve nga të cilat vijnë, duke i paraqitur ato në stendat përkatëse.
Nuk munguan edhe ushqimet tradicionale të përgatitura nga vetë ata, lojërat e ndryshme, shfaqjet artistike dhe një sërë aktivitetesh të tjera që i dhanë një atmosferë ndryshe.
Kolegji Universitar Bedër në Bashkëpunim me Institutin Shqiptar të Medias organizuan trajnimin e radhës në kuadër të projektit “Edukimi për Median dhe Informacionin për Mësuesit e Ardhshëm”, ku pjesëmarrës ishin dhe pedagogët e Departamentit të Edukimit dhe Gjuhës Angleze.
E ftuar në këtë trajnim ishte Carolyn Jones, specialiste e programit Fulbright, e një karrierë të gjatë në gazetari dhe përvojë në edukimin mediatik, solli përvojën amerikane në fushën e edukimit për median dhe informacionin dhe zhvilloi një seancë trajnimi dhe bashkëbisedimi me pedagogët pjesëmarrës për mënyrat më të mira për të përfshirë studentët dhe të rinjtë në drejtim të edukimit mediatik.
Gjatë trajnimit Carolyn Jones u ndal te sfidat kryesore në lidhje me dezinformimin në peizazhin mediatik në SHBA, duke prekur tema të tilla si dobësimi i besimit te mediat tradicionale, forcimi i teorive të konspiracionit dhe i personazheve që i përhapin ato në debatin publik, si dhe konteksti i zhvillimeve politike dhe si kanë ndikuar ato në besimin që ka publiku te media.
Gjatë trajnimit vëmendje e veçantë iu kushtua edukimit për median dhe informacionin si një nga mënyrat më të mira për të rritur imunizimin e publikut ndaj çrregullimeve informative. Duke sjellë shembuj të ushtrimeve dhe qasjeve konkrete me studentët në shkolla në lidhje me këtë temë, trajnerja ilustroi disa metoda që mund të përdoren në mënyrë që studentët të hyjnë në brendësi të gjithë zinxhirit të prodhimit të lajmeve, një njohuri që me sa duket është gjithnjë e më e rrezikuar.
Trajnimi u mbyll me një diskutim me pedagogët për sfidat e arsimit në vend, por edhe në kontekstin global, sidomos në kuadrin e ndryshimeve teknologjike dhe prirjeve të çrregullimeve informative.
Ky trajnim është pjesë e projektit “Edukimi për Median dhe Informacionin për Mësuesit e Ardhshëm,” të zbatuar nga Instituti Shqiptar i Medias, me mbështetjen financiare të Zyrës së Marrëdhënieve me Publikun të Ambasadës Amerikane në Shqipëri.
Departamenti i Gjuhës dhe Letërsisë Angleze zhvilloi një seri leksionesh me të ftuar znj. Arta Dade.
Në leksionet e hapura të cilat u organizuan në disa ditë morën pjesë studentët e Masterit Shkencor në Gjuhë Letërsi Angleze, studentët e Masterit Profesional në Mësuesi për Arsimin e Mesëm të lartë dhe Arsimin e Mesëm të Ulët si dhe studentët e Programit Bachelor.
Fokusi i leksioneve të hapura ishte tek bashkëpunimi rajonal dhe kontributi i Shqipërisë në rajon dhe më gjerë.
Ndër temat kryesore të leksioneve ishin:
• Integrimi i Shqipërisë në BE
• Bashkëpunimi Rajonal si parakusht për integrimin në BE
• Kontributi i Shqipërisë në NATO
Qendra për Zhvillim të Qëndrueshëm dhe Inovacion në bashkëpunim me Departamentin e
Shkencave Kompjuterike organizuan seminarin me temë: “Një jetë në arsim! Si të kultivojmë
vlera për arsimin?”, me të ftuar Prof. Dr. Sadije Bushati.
Pjesëmarrës në këtë aktivitet ishin studentë të Departamentit të Edukimit dhe Gjuhës Angleze, programi Master Professional për Mësuesi në Gjuhën Angleze dhe të Departamentit të Shkencave Kompjuterike.
Znj. Bushati diskutoi me studentët sfidat dhe arritjet e saj gjatë rrugëtimit si akademike në
arsimin e lartë duke bërë një krahasim të mundësive që i janë ofruar gjatë regjimit komunist dhe
atyre që ofrohen sot, si për studentët edhe stafet akademike.
Prof. Bushati theksoi se përpos sfidave që paraqet çdo kohë apo sistem politik ku ne jetojmë,
çdokush duhet të bëjë përpjekjet maksimale për të kthyer çdo vështirësi në avantazh dhe në favor
për arritjet profesionale.
Këmbëngulja, motivimi dhe pasioni për dijen janë elementë shumë të rëndësishëm në rrugëtimin
drejt arsimimit.
Seminari u mbyll me pyetje dhe diskutime me interes nga studentët.
Njësia e Sigurimit të Cilësisë së bashku me Departamentin e Edukimit dhe Gjuhës Angleze organizoi një takim informues me studentët e arsimit dhe gjuhës angleze në kuadër të procesit të akreditimit të programit të tyre.
Fakulteti i Teknologjisë dhe Biznesit, në bashkëpunim me Departamentin e Gjuhës dhe Letërsisë Angleze organizuan për studentët leksionin e hapur me PhD. Peter Schadt me temë “Kapitalizmi digjital, kontradiktat e digjitalizimit të industristë”.
Në leksion, u diskutuan gjerësisht kontradiktat e procesit të digjitalizimit ndër të cilat përmendim interesin në rritje të kompanive për të digjitalizuar prodhimin e tyre, programin Industry 4.0 të shtetit gjerman si dhe rolin e punës në kapitalizmin e digjitalizuar.
Nuk munguan pyetjet e studentëve lidhur me temën e trajtuar, duke e bërë edhe më interaktiv takimin.